काठमाडौं: नेपाल आइसिसी महिला टि ट्वान्टी विश्वकप छनोटको आफ्नो पहिलो खेलमा थाइल्याण्डसँग ८ विकेटले पराजित भएको छ।

१ सय २३ रनको लक्ष्य थाइल्याण्डले १६.५ ओभरमा २ विकेट गुमाएर पूरा गरेको हो। थाइल्याण्डका लागि नाथाकान चानथामले अर्धशतक बनाइन् ।

उनले ३९ बलमा ९ चौका र १ छक्कासहित नटआउट ५७ रन जोडिन् । ननापाटले ३२ रन जोडिन् । नेपालका लागि सरिता रानाले २ विकेट लिइन् ।

कीर्तिपुरस्थित टियु रंगशालामा थाइल्याण्डले टस जितेर पहिला फिल्डिङ रोजेपछि नेपालले ब्याटिङ गरेको थियो। नेपालले २० ओभरमा अलआउट हुँदै १ सय २२ रन जोडेको थियो ।

नेपालका लागि विन्दु रावलले सर्वाधिक ४४ रन बनाइन् ।

विन्दु रावल र सम्झना खड्काले राम्रो सुरुवात गरेपनि त्यसपछि अन्य ब्याटरले खासै इनिङ सम्हाल सकेनन् । विन्दु र सम्झनाले पहिले विकेटका लागि ५२ रनको साझेदारी गरेका थिए।

सम्झनाले ११ बल ६ चौकासहित २६ रन बनाइन्। सम्झना र विन्दु रावलले पहिलो विकेट ५२ रनको साझेदारी गरेका थिए।

त्यसपछि विन्दु र पूजा महतोले इनिङलाई अघि बढाए। १३।३ ओभर विन्दु आउट भइन् । उनको टि ट्वान्टीमा यो उच्च स्कोर हो ।

पूजा १७ बलमा १२ रन बनाएर आउट भइन् । कप्तान इन्दु बर्मा ६ रनमा आउट भइन् । रुविना क्षेत्रीले १० बलमा १७ रन जोडिन् । नेपालले अर्को खेल बिहीवार नेदरल्याण्ड्ससँग खेल्नेछ।